Al 20 jaar de nieuwssite voor Genemuiden!
22 juli 2024 t’ Olde Staduus
Agenda
Van Dijk Heftrucks (tijdelijk)

‘t Aepeneute beumpien

Geplaatst op: 24 april 2023

‘k Mosse opiens deinkn an dat kleine beumpien met dat raere grünachtige blad dat wörtel eskeutn ad achter de skure van Bekendemmegien. ’t Skuurtien stond an ’t einde van ut terrein waor as de skure van Aort van Janom stond. Stief op de raand van de Ni’jedieksloot. Bekendemmegien reed op een olde roestige en kraekende fiese en fieste altied met een bos buuzn op de skolder en dreug zodoende zien onofskeidelijk pet op half zeum.

De man deu in buuzn en kiepn, i’j ad wel meer as 100 kiepn in dat krakkemikkige öltn skuurtien. Aj d’r langes leupn, dan leek ’t wel een vergaerige van de plattelandsvrouwnverienige, zo’n lawaai maekten die krengn. Soms kneep d’r welies zo’n ontevreden kiepe tusn uut en leup dan luudkeels te skroewn en te kaekeln in de berm van d’Industriestraote. En dan, ja dan was die grootbek veur ons. ’t Was miestal mien neefien die ‘m in de kladn greep en we klumn saems dan met kiepe en al over de skuttige naost ’t skuurtien van Bekendemmegien en dan leutn wi’j de kiepe zwemn in de Ni’jedieksloot. En as ’t er now ook mer iene is die as beweert dat kiepn niet kunn zwemn dan lög ie dat as ie berst.

Met kiepn kuj trouwns ook allemachies vule lol em, teminste as ze dronkent bin. Wi’j voerden al die kiepn ies rooie beezn waor as een tante van ons jenever van ‘emaekt ad. 100 dronken kiepn kuj ’t oe veursteln? Dat was pas lachn. Toen as wi’j ies weer zo’n vluchteling leutn zwemn zaagn wi’j ’t Aepeneute beumpien staon.

An de raand van de Ni’jedieksloot tussen duuzenden aepeneitedopn greuide zo mèr een iel klein beumpien. Want op zoemerse zundaegen as de wiend uut ’t westen kwam en ’t halve Gellemuun al wandelend kilo’s aepeneuten soldaot maekte, waeiden al die “Sunnese Dopn” die op de straote dwaerrelden achter ‘t kiepeskuurtien van Bekendemmegien. En wi’j wussen zeker dat ‘r in iene van die dopn nog een aepeneutepittien ezeten ad wat op ekoomn was.

Mien neve en ekke bin d’ienigen in ’t iele Gaellemuun die as tot op de dag van vandaege zeker wieten dat ‘r ooit in Gaellemuun aepeneuten egruuid em.

Jan L Mateboer
Stienwiek

Gepubliceerd door Robert Jansema
Van Dijk Containers 500