Kerstoamd

De skure was op-eruumd, leste werkdag van ‘t joar.
Iederiene tevreedn, mooi op tied kloar
Met d’iele bups an bier en petat in de kantine
En Jopie die ‘t lecht uut deu achter de stansmesiene

Now zit ek op de fiese, bietien teut en dubbelziend.
Dekke dekke mist maer gelukkig gien wiend.
Et kerstpakket onder de snelbienders
en op weg noar vrouw en kienders
kats veralderiert bin ek de weg ielemoale kwiet
Ek fiese wat rond in ‘ n gries en klam gebied

Ek jakkerde ‘n rood lecht veurbi’j in de dechte mist
En tien meter verder wörde mien geheugn haerdhaandeg opefrist
Mien kerspakket dreef op ‘t waeter en ek dobberde d’r noast
Ek ware volgas et veergat in eroast

‘T was ‘n öltn kissien met ‘n flesse beernburg, dat kerstpakket.
Dat kado van de boas ef mien leevn doar ered.
Ek drunke de flesse leeg want dan dreef ie vule beter,
Saemn met dat kissien en de wal op vuuf meter

Ek erinnerde mi’j, ek ware bange veur de ankoomnde pont
Dus ek ploeterde noar de wal as n verzeupn ond
Mien aandn klauwdn an ‘t beton en ek vuulde vaste grond
Ek dachte nog, zo ronddobbern op kerstoamd is niet bepoald gezond

Ek wörde ‘t waeter uut etrökkn deur ‘n jonge van de Spelde
Die was op weg noar zien skaerrel in de Velde
Toen kwam d’r iene van slaeger van der Steeg
Die zee, jochien, jochien wat breng ie wat te weeg
Ek eb net de dokter ebeld
en tegelieke d’ambulance maer besteld

Ie waarn griesblouw en ielemoale onderkoeld.
Ie addn oen kerstoamd vaste wat aanders bedoeld
Ier laeg ek dan in diep gepeins te verzaandn
Onder ‘n tl laampe in ‘n baede van de Weeznlaandn

Twas Kerstoamd 1985
De keersies braandn prachtig
Op de baelie van de zuster
En ek wörde weer ‘n bietien waerrem in ‘n geliende duster

Mien vrouwe jammerde; woarumme goa’j dan ook fiesn met ‘n snee in de neuze ?
ie addn wel kunn’ eindegen in ‘n eultn deuze!

Now, zaeg ek, et was gewoon gezelleg in de kantine
Met Jopie van de stansmesiene!