Al 20 jaar de nieuwssite voor Genemuiden!
25 mei 2022 t’ Olde Staduus
Agenda
Van Dijk Heftrucks (tijdelijk)

Eddy Bilder beklaegt zich over besmettingn (column Herman Mateboer)

Geplaatst op: 22 maart 2021

Et verbaast mi’j allemoale neks aa’j ofgoan op de simpele feitn dat wi’j allemoale groepsdiern bin die et beste floreern bi’j interactie, bi’j et anraekn van oen medemeinse die aa’j al zo lange em buutn muun parkeern vanwege de regels. En elke keer dat as ie weer bi’j mekaere koomn et onderwerp is of dit now allemoale niet simpeler, beter, kan.

Dan goa’j op zuuk noar mekaere en doar skuult et gevoar ook metiene. Mien skoonzuster löp net de deure uut met eur man. De Boozn bin zwoar in overtreding, ek wiet’et. Um twie uur zaatn wi’j al an de rum met cola. Dat is et ienege draenkien noast zuute wien wat mi’j nog smaekt noa dat ek vier moand geleedn corona opleupe. De mieste wien smaekt mi’j nog steeds niet. As ek mien neuze in ‘n wienflesse steke dan roek ek ‘n weeë zuutege geur die mi’j teegn stet. Allient Perlenbacher weizenbier van de Lidl smaekt mi’j nog maer, veur wat bier betreft. Geleuft mi’j, as rechtgeaard draankörregel bin ek elleke supermarkt en slijter of’eloopn. De negroamaro, rooie slobberwien van de Plus, die muu’k em. Ek maeke meters bi’j de vleet, ek bin as ‘n bezetene op zuuk noar draank die mi’j nog wel smaekt. Duur spul van 15 euro de flesse get nog wel, vremd genog smaekt glühwein mi’j ook wel en zuute broene rum met cola. De rest, ‘n lekkere vette carmenere uut Chili of ‘n mooie ronde Valpolicella? Et rök nog erger dan Listerine mondspuulsel. En dat vier moand laeter. Ek ope toch echt dat dit nog ‘n keer rechttrekt want et is niet leuk.

Drie weekn zat ek opesleutn in Istanbul in et appartement van ‘n collega die op vekaansie was, wachtn tot corona weer vertrök. Ek bin d’r goed van of ekoomn. Bietien zeerte in de kop en veural muu. Dezelfde collega die mi’j zien appartement ofstond zit now al twie weekn in ‘n quarantaine zieknuus in Hong Kong. Volgns de procedures leut i’j ‘m testn veur zien vlucht noar Hong Kong, negatief. Kump doar an, wördt positief etest en in ‘n ambulance of evoerd noar ‘n zieknuus. Wördt aerdstekke ziek, longontsteeknge, an ‘t zuurstof, muu en ziek as ‘n ond. Duuzndn kilometers verwijderd van vrouw en kienders, en as ‘t slecht oflop dan is ie finished in zien dooie ientien. ‘N Keerl van 56, fit as a fiddle, elleke dag aerdloopn, gien graemmechien vet an de balg, en zo ziek as ‘n ond. Corona ef vule gedaantes en wi’j em gien idee woar et en get. Ek zie mi’jzelf maer as gezeegnd dat et niet erger uutpakte veur mi’j.

De kienders goan um ellef uur op stok, ‘n uur noa de oldn, want wat muu’j aanders? De jongn verpietern um dat ze ook zwoar beperkt bin. Zie werkn allemoale op bi’jbaenties in ien of aandere supermarkt en zien juust de senioorn die overal skijt an em. Zie koomn tiernd tuus en doen eur beklag dat de olde knakkers woarveur zie zich an de regels oldn de regels overal en nergns an de leerze lappn. Ek zie et ook. Wat is dit, oezo kunn’ deze meinsn zo’n kompleet disrespect em veur de regels die op-estelt bin um eur juust te beskermn? Wat wil ie dan? Et ef vule weg van ‘n soort balorig’eid, skijt an de overheid. Maer wi’j muun dit toch met zien alln doen. D’r is gien keuze.

Ofgeloopn weke zaagn wi’j de president van Tanzania et onderspit delvn um dat i’j kompleet ontkende dat er ‘n probleem was v.w.b. Corona. I’j kan ‘t niet noavertelln. Bolsonaro in Brazilië dut net of d’r neks an de aand is maer zie goan dood met de bussies doar. Zie em doar mobiele crematie centra, oe droevig kan ‘t wörn?

Mien skoonzuster en zwoager em de tied van eur leevn. Eur tuincentrum löp as ‘n tierelier. 13 joar geleedn addn zie ‘t lumineuze idee um vuurwerk te goan verkoopn an ‘t einde van ‘t joar. In drie daegn addn ze net zo vule umzet as aanders in ‘n allef joar met et verkoopn van petunia’s, pergola’s en de peperneutn bi’j de kassa. Zie em zo vule vollek um eur en, elleke dag, dat ze weinig behoefte em an nog meer contact. Gien vuurwerrek meer verkoopn is niet onoverkomelek dankzij corona.

Zundag is met recht eur rustdag. De aandere ellefte van de familie verdient de kost in de luchtvaart die ielemoale op zien gat leg en dinkt, woar get deze nachtmerrie eindign. Proatn over uuterstn.

Mien skoonmoeier ef ni’je buurn in eur bejaordnflat en de man des uizes leg s’morns met et opkoomn van de zunne (de tied stet elke dag op de weerapp) op de knieën en dut zien gebed noar Mekka. Sinds ze ‘m dudelek ef emaekt dat ze van dat gemurmel um alfzeuvn niet gediend was dut ie ‘t in de woonkaemer, maer tussn de tied dat de zunne in ‘t oostn steg en weer ten onder get in ‘t westn kan i’j, net as wi’j, slechts ervaarn dat dat et ienege is wat zeker is. En doar kunn’ wi’j, controlfreaks dat wi’j bin, ons maer slecht mee verienzelvegn.

Maer aa’j niet in allefdood in ’n zieknuus laegn verre weg van oen geliefdn maer tuus en gezond bin dan doe’j nog niet zo slecht.
Bing Crosby wus et wel. I’j zung— Each night I go to sleep, I count my blessings and not the sheep.

Herman Mateboer

Gepubliceerd door Robert Jansema
Van Dijk Containers 500